Policaje prawie znodli starzika, kerego ftoś ôbwiesił w szranku u niego w doma. Do kōmisorza Achima Hanusika to je cosik wiyncyj jak ańfachowo zbrodnia. Bydzie musioł jeszcze roz trefić sie ze swoimi nojgorszymi spōminkami: ô downyj libście i chopie, kery jōm zamordowoł. Eli inkszy gizd, na kerego godajōm „Ryszawy Erwin”, poradzi mu terozki pomōc? W tyn som czas w Mikołowie ftoś szczylo do policaja, a cōłko sytuacja cosik Hanusikowi spōmino… Jakby tego było mało, normalne ludzie miyniajōm sie w mordyrzy skuli maszketnego psychoterapeuty. Bydzie sie dzioło.
Marcin Melon – rechtōr, pisorz, tumacz i nowiniarz. Działo na rzecz ślōnskij edukacyje regionalnyj, m.in. organizuje turniej dlo modych „Silesia Incognita”. Dwa razy wygroł kōnkursy na Jednoaktōwka po ślōnsku. Napisoł sztyry tōmy przigōd Kōmisorza Hanusika. Wydoł ślōnsko-angelske godki na wesoło „Co by pedzioł Szekspir?” W 2023 roku wydoł powieść fyminstyczno z czasōw PRL: „Truda Latuscyno retuje socjalizm”.
